|
|
 |
|
|
 Arnarfjörður, Hvesta og hin leiðin
Undanfarið hefur þó nokkuð verið ritað hér á Arnfiðingi um olíuhreinsunarmál. Sumum andstæðingum slíkrar starfsemi þykir kannski nóg um og velta kannski fyrir sér hvort þessi vefur sé áróðursmiðill fyrir fyrrnefnda starfsemi. Ekki er þó svo. Ef tekið er t.d. mið af bb.is, sem er sjálfstæður miðill, hefur líklega meira verið ritað þar um þessi mál. Hefur þar jafnvel borið á að staðsetning í Hvestu sé erfiðari fyrir norðursvæðið en Hólar/Sandar. Ekki er þó verið að segja að það sé áróður. Úr Arnarfirði er ekki margt frétta og því kann fyrrnefnd umræða hafa virkað full áberandi. Tekið hefur verið tillit til skýrslna sem unnar hafa verið af „viðurkenndum aðilum“ en einhversstaðar reynt að brúa skilning.
Svo getur skrifari skift um skó þannig að kápan skipti litum
Hvað er framundan?
Það hefur ekki birst skýrsla um hvað gerist ef væntingar margra um olíuhreinsistöð verður að vonbrigðum. Verður það flótti hjá því unga barnafólki sem hefur tök á að fara? Aðeins tíminn leiðir það í ljós. En í ljósi þess sem heyrist frá fólki sem ég leyfi mér að taka mark á, er mjög margt sem bendir til þess. Spurningar í Speglinum á RUV eins og t.d., er ekki tímaskekkja að setja olíuhreinsistöð niður í Arnarfjörð sem er fullur af fallegum fjöllum, með sjálfbærar fiskveiðar og ferðaþjónustu í góðum vexti?, hljóma eins og fagurt æfintýri, en staðreyndin er sú að ef ekki kemur til einhver öflug starfsemi, sem fólk trúir á að verði til langs tíma á þetta svæði, þá verður afskaplega „friðsælt“ við Arnarfjörð.
Hvað þá?
Ljóst er þó að ýmsir eru þannig í sveit settir að komast ekki burtu þó vilji væri fyrir því. Á þá byggð við Arnarfjörð að dragast hægt til dauða, með veraldlegu gjaldþroti margra og andlegum hremmingum?
Ekki endilega.
Mjög mörgum þykir Arnarfjörður sérlega fagur og hans eigi að njóta svo sem náttúran býður. Hann ætti því að vera fyrst og fremst til yndis.
En hvernig?
Ríkið myndi kaupa allar eignir á Bíldudal (af þeim sem vilja selja) svo að það fólk sem vill fara, geti farið með reisn og komið sér fyrir annarsstaðar. Fjörðurinn losaður frá Vesturbyggð og Vesturbyggð þannig losuð undan ýmsum þjónustuskyldum. Síðan yrðu eignir á staðnum boðnar til kaups á þeim forsendum að Arnarfjörður væri fyrst og fremst frítímaland, þá væntanlega mest á sumrin. Fólkið á staðnum hverju sinni væru þá fyrst og fremst eigendur húsa, gestir í leiguhúsnæði félagasamtaka eða frítímafyrirtækja og starfsmenn nauðsynlegrar þjónustu. Svona frítímastaður drægi eflaust að sér fleiri farandgesti, því í slíkri frítímabyggð væru flestir í því að njóta sín í frítíma og því létt yfir mannlífi. Margir skammtíma- og farandgestir myndu enn auka möguleika á afþreyingarstarfsemi á sumrin. Slíkt myndi hafa góð áhrif á byggðarlög í grennd við Arnarfjörð.
Samgöngur
Samgöngur hafa verið baggi sem háð hefur sunnanverðum Vestfjörðum. Samþykkt hefur verið að gera s.k. Dýrafjarðargöng. Á það hefur verið bent í skýrslum og skrifum tengdum olíuhreinsistöð, að norðan- og sunnanverðir Vestfirðir séu ekki og verði aldrei eitt atvinnusvæði. Allt kappt hefur verið á að tengja norðursvæðið til höfuðborgarinnar um Djúp. Því ætti að sleppa því að gera umrædd Dýrafjarðargöng. Þess í stað skyldi gera góðan sumarveg yfir Dynjandis- og Hrafnseyrarheiði vegna ferðafólks. Það gerir svæðið aðgengilegra ferðafólki en samt sem áður hrikalegt og spennandi. Vestfirskt. Leggja skyldi kapp á að heilsárstengja sunnanverða Vestfirði suður á bóginn. Það myndi styrkja Vesturbyggð og Tálknafjörð árið um kring. Það myndi einnig styrkja Arnarfjörð sem frítímaland.
Hvers vegna?
Það virðist ljóst að það sem hafið gefur, dugir ekki til að halda lífi í þremur þorpum sunnan Dýrafjarðar. Því skyldi hugsa þetta upp á nýtt. Finna nýtt hlutverk. Minnka þjónustskyldu Vesturbyggðar sem yrði aðskilin Arnarfirði og sinnti betur þrengra svæði. Arnarfjöður er stór, fagur og fjölbreyttur. Hugsaður sem frítímaland og markaðssettur sem slíkur. Sem einstakt fyrirbæri á Ísland, gæti hann gefið meira af sér í krónum talið fyrir nágrannabyggðir en nú er. Og, auðvitað mun skemmtilegra.
Það er kannski svo með þessa hugmynd að virðast geggjuð. En það er í góðu lagi. Þá koma kannski einhverjar betri.
Hvað þarf til?
Það þarf skilning á því, að ef ekki kemur til einhver sú starfsemi í Arnafjörð sem breyti búsetuskilyrðum svo einhverju nemi, þá dugi ekki að klóra í þann bakka sem klóra hefur verið í undanfarin ár.
Það þarf mennsku til að hafna því að byggðin deyi hægt og hægt, en örugglega, að Arnafjörður hinn fagri verði lífvana eyðislóð.
Það þarf ríkisvald til að kaupa upp eignir og endurskilgreina svæðið. Aftengjast Vesturbyggð. Mynda nýja stjórn um svæðið. Sú stjórn þarf að hugsa hlutina með allt öðrum hætti en í hefðbundnu sveitarfélagi.
Það þarf að gera tilraunir. Þetta gæti verið tilraun. „Tilraunadýrin“ yrðu öll með upplýstu samþykki.
Það þarf að gera eitthvað annað og meira, en bara að „vera á móti“ (eins og t.d. einhverri tiltekinni atvinnustarfsemi).
Er ekki till eitthvað betra en svona „rugl“?
Kannski.
Arnar Guðmundsson
|
|
| Til baka |
|
|
|
|
