Um og eftir aldamótin tók Málfundafélagið Bíldur, er þá starfaði af miklum krafti, málið upp og náðist fljótt samstaða um að byggja kirkju á Bíldudal.

Bíldudalskirkja

Bíldudalskirkja var byggð 1905-1906 og vígð 2. desember 1906 af þáverandi prófasti sr. Bjarna Símonarsyni á Brjámslæk ásamt sr. Böðvari Bjarnasyni á Hrafnseyri og sóknarpresti sr. Jóni Árnasyni en sr. Jón Árnason hafði verið vígður til Otradals árið 1891.

Í Otradal hafði verið prestur og sóknarkirkja Suðurfjarða frá öndverðu og er hennar getið í kirknatali Páls Jónssonar frá 1200. Ekki er lengur kirkja í Otradal en nokkur minnismerki er að finna þar í gamla kirkjugarðinum. 

Í Bíldudalskirkju eru ýmsir merkir gripir. Þar á meðal er skírnarsár, kaleikur og patína úr silfri. Enn má telja þar tvær altaristöflur. Sú yngri er frá 1916 máluð af Þórarni B. Þorlákssyni listmálara og sýnir Maríu við gröfina er Kristur sagði: „Kona, hví grætur þú?" Hin eldri er frá 1737 úr Otradalskirkju og sýnir heilaga kvöldmáltíð. Í kirkjunni er predikunarstóll úr Otradalskirkju frá 1699 með myndum af Kristi og postulunum. Selárdalskirkja tilheyrir prestakallinu.

Gamli barnaskólinn og Bíldudalskirkja

Höfundur Bíldudalskirkju er Vestfirðingurinn Rögnvaldur Á. Ólafsson sem oft hefur verið nefndur fyrsti íslenski arkitektinn. Kirkjan er steinsteypuhús og er fyrsta steinsteypubyggingin sem Rögnvaldur teiknaði. Hún er meðal annars sérstök fyrir það að í yfirborð útveggja hennar eru grópaðar fúgur í líki steinhleðslu. Upphaflega var kirkjan með skorstein á vestari enda gengt turni. Um langt árabil var einnig ljósakross á turninum en í dag skartar kirkjan sínum upphaflega krossi.

Aðrar kirkjur sem Rögnvaldur teikaði eru Þingeyrarkirkja, Gufudalskirkja og Hjarðarholtskirkja í Dölum en hann teiknaði margar fleiri.

Bíldudalskirkja er í Bíldudalsprestakalli í Barðastrandarprófastsdæmi. Hún er friðuð frá 1. janúar 1990 samkvæmt þjóðminjalögum. Bíldudalskirkja er hin reisulegasta og sómir sér vel.