Í garði við Dalbraut 50 á Bíldudal má sjá mörg skemmtileg listaverk eftir Óskar Magnússon. Listaverk þessi eru ýmist unnin í járn eða steinsteypu og bera merki um mikið hugmyndaflug og sköpunargleði listamannsins. 

Mesta athygli vekur stór og tígulegur haförn sem Óskar steypti úr afgangs steypuslettum þegar hann vann við að reisa hús sitt. Húsið kallar hann Arnarklett.

Gosbrunnur sem heldur uppi bolta vekur einnig mikla athygli. Það er auðvelt að gleyma sér þegar horft er á boltann dansandi efst á bununni. Detti boltinn niður leitar hann aftur í miðja bununa og lyftist upp á ný.

Járnlistaverk Óskars eru af ýmsum toga. Má þar nefna Grétu Garbo sem arkar áfram með sín dökku sólgleraugu og ber hönd fyrir höfuð sér til að verjast ágangi ljósmyndara.

Hösmagi var mannýgur hrútur í Drangey. Þeir bræður Grettir og Illugi höfðu gaman að honum og tímdu ekki fyrir nokkurn mun að aflífa hann þótt stundum væri fátt um fína drætti í fæðuöflun.

Kraftlyftingamaðurinn bjástrar við lóðin þung. Lítil frænka Báru, konu listamannsins, var eitt sinn í heimsókn ásamt foreldrum sínum og þegar hún sá lyftingamannin hrópaði hún upp: „Nei sko, þarna er pulsukallinn!”

Blómið er með gormum í stilk og laufblöðum og bærist skemmtilega í hægum vindi. Ef hvessir hraustlega lætur blómið öllum illum látum.

Ljósár heitir þetta listaverk og er pæling listamannsins um himingeyminn.

Stangaveiði hefur lengi verið eitt af mörgum áhugamálum Óskars og hefur hann margan laxinn veitt í gegnum tíðina. Hvort nokkur þeirra hefur verið svona vænn skal ósagt látið en þennan myndarlega lax gerði Óskar úr steinsteypu.

Blómið og haförninn

Haförnin, gosbrunnurinn og blómið

Ljósmyndir Jón Þórðarson (jth@snerpa.is)