Páll Björnsson fæddist 1621 og lést 23. október 1706. Foreldrar hans voru Björn Magnússon sýslumaður í Bæ á Rauðasandi og síðari kona hans Helga Arngrímsdóttir lærða Jónssonar. 

Páll lærði í Hólaskóla við mikinn orðstír og varð stúdent tvítugur árið 1641. Hann var kominn í Kaupmannahafnarháskóla sama ár, lauk prófi 1644 og kominn heim sama ár.

Hann var konrektor í Hólaskóla veturinn 1644-1645, vígðist til Selárdals 25. mars 1645, tók við öllum staðnum 1647 og sat Selárdal í 61 ár til æviloka. Hann varð einnig prófastur í Barðastrandasýslu í yfir 50 ár. Séra Páll er sagður hafa afþakkað biskupsstöðu í Skálholti vegna þess hve vel fór um hann í Selárdal. Hann hefur verið sagður af samtímamönnum minnisstæður að gestrisni og höfðinglegu ljúflyndi.

Hann var einn lærðastur Íslendinga á 17. öld og flestum fjölhæfari. Tungumálamaður var hann svo af bar, einkum í Austurlandamálum, hebresku og grísku og kenndi hann mörgum þau mál. 

Hann var vel að sér í stærðfræði, kunni skil á siglingafræði og stjörnufræði og reiknaði fyrstur út hnattstöðu Bjargtanga. Gott skyn bar hann á náttúrufræði og skrifaði margt um trúfræði.

Hann hafði útræði í Selárdal og fann upp betra lag á bátum en áður hafði verið. Hann er talinn fyrstur Íslendinga til að stunda fiskveiðar af þilskipi og því brautryðjandi á því sviði og merkur maður í atvinnusögu landsins.

Séra Pál hneigðist einnig að dulfræði og þrátt fyrir allan sinn lærdóm og hagnýta þekkingu var hann barn síns tíma. Kom þar til meðal annars að kona hans, Helga Halldórsdóttir (1617-1704), var haldin langvinnri taugaveiklun og geðbilun sem kennt var göldrum. Lá oft við sturlun margra heimamanna í Selárdal af þesum sökum og flýðu menn bæinn. Voru alls fimm menn brenndir til bana vegna þessara mála (sex segir Einar Laxness). Að öðru leyti en í galdramálum var hann ekki talinn ofstækismaður. 

Þorleifur Kortsson lögmaður (d.1698) mun eiga stóran þátt í því hvernig mál þróuðust í þessum ofsóknum séra Páls. Þess má einnig geta að hálfbróðir séra Páls var Eggert ríki Björnsson sýslumaður í Barðastrandasýslu sem sagður er hafa gengið hart fram í galdramálum.

Tvö börn þeirra Helgu og Páls bjuggu áfram í Arnarfirði, séra Halldór sat Selárdal eftir föður sinn og Þóra átti Árna Guðmundsson á Hóli í Bíldudal.

Helgi Hjálmtýsson ( postholf@yahoo.com )
Eftir ýmsum heimildum