Vala Flosadóttir er fædd 16. febrúar 1978 í Reykjavík en er uppalin á Bíldudal. Foreldrar hennar eru Flosi Magnússon og Ragnheiður Jónasdóttir. Systir Völu er Lára Flosadóttir. Þær systur eiga ættir að rekja til Vestfjarða og Austfjarða.

Vala æfði flestar greinar íþrótta á Bíldudal og var mjög efnileg í hástökki.

Fjölskyldan flutti til Lundar í Svíþjóð árið 1992 og Vala hóf á ný að æfa frjálsar íþróttir haustið 1993.

Vala Flosadóttir náði þeim stórkostlega árangri í stangarstökki að stökkva 4.50m og ná með því þriðja sætinu í stangarstökkskeppninni á Ólympíuleikunum í Sydney í Ástralíu árið 2000. Er hún fyrst íslenskra kvenna til að komast á verðlaunapall á þessari miklu íþróttahátíð allra tíma og þriðji Íslendingurinn sem nær því að komast á verðlaunapall Ólympíuleika.

Ólympíuleikar 2000

Að loknu brons-stökkinu

Úrslitin í stangastökki kvenna

Afrekaskrá Völu

• Heimsmet unglinga utanhúss, 4.17m 1996.
• Heimsmet unglinga innanhúss, 4.16m 1996.
• Evrópumeistari, 4.16m 1996.
• Heimsmet unglinga innanhúss, 4.20m 1997.
• Evrópumeistaramót unglinga utanhúss, silfur 1997.
• Norðurlandamet innanhúss, 4.26m, 1998.
• Evrópumet innanhúss, 4.35m, 1998.
• Heimsmet innanhúss, 4.42m, 1998.
• Heimsmet innanhúss, 4.44m, 1998.
• Evrópumeistaramót innanhúss, brons 1998.
• Norðurlandamet utanhúss, 4.20m, 1998.
• Norðurlandamet utanhúss, 4.31m, 1998.
• Norðurlandamet utanhúss, 4.36m, 1998.
• Norðurlandamet innanhúss, 4.45m, silfur 1999.
• Evrópumeistari 22 ára og yngri, 4.30m, júlí 1999
• Bronsverðlaun á Ólympíuleikunum í Sydney, 4.50m, sept. 2000

Vala stekkur á Bíldudalsvelli sumarið 2000

Svifið fjöllum hærra
Unglingalandsmót UMFÍ var haldið í Vesturbyggð og Tálknafirði sumarið 2000. Þar keppti Vala Flosadóttir í fyrsta skipti á heimavelli eftir að hún varð alþjóðleg íþróttastjarna. Um 3000 til 4000 áhorfendur voru að keppninni og á mynd Finns Péturssonar á Tálknafirði sést hluti þeirra fylgjast með Völu svífa fjöllum hærra á íþróttavelli Bílddælinga sem sannarlega var hápunktur mótsins.

Forseti Íslands herra Ólafur Ragnar Grímsson sæmdi Völu Flosadóttur riddarakrossi fálkaorðunnar að Bessastöðum á nýársdag 2001 fyrir afrek hennar í íþróttum. Vala var kjörin Íþróttamaður ársins 2000.