Arnfirðingahátíðin Bíldudals grænar... fór fram nú um helgina á Bíldudal. 

Kolbrún Pálsdóttir fulltrúi í bæjarstjórn
býður gesti velkomna fyrir hönd Vesturbyggðar

Um 1.200 gestir voru á hátíðinni þegar mest var um að vera á laugardeginum. Fór hátíðin vel fram að öllu leyti og ríkti almenn ánægja meðal gesta. 

Dagskrá var fjölbreytt og var að öllu leyti í höndum Arnfirðinga sem fengu aðstoð spænskra matreiðslumanna er komu alla leið frá Spáni til að elda Bíldudals Baccalà - saltfiskrétti eldaða að spænskum hætti. Bíldudals Baccalà er líklega elsta eða með elstu vörumerkjum Íslandssögunar. 

Völumót var sett í fyrsta sinn á laugardeginum - skemmtilegt krakkamót þar sem krakkar fengu að reyna sig í íþróttum undir leiðsögn Völu Flosadóttur afrekskonu í íþróttum.

Formleg dagskrá stóð í þrjá daga og hófst með hátíðlegri setningu á Tungunni á Bíldudal þar sem nýtt fánamastur var vígt og ræður fluttar.

Á dagskrá voru skrímslaferðir um Arnarfjörð, skoðunarferðir út í Ketildali, skipulagðar gönguferðir, sölubásar, hoppukastalar og þrautir, leiksýningar, gestum boðið að smakka nýveidda rækju úr Arnarfirði sem soðin var á bryggjusporðinum, kraftasýning, veiðikeppni, myndlistasýning, hátíðarmessa í Bíldudalskirkju og sýning á munum frá þeim tíma er heiðurshjónin Ásthildur Guðmundsdóttir og Péturs Jens Thorsteinsson bjuggu á Bíldudal. 

Laugadeginum lauk svo með harmonikkuleik og hljómsveitatónleikum þar sem fram komu bílddælskar hljómsveitir með Facon í broddi fylkingar.

Fyrir hátíðinni stóðu Arnfirðingafélagið í Reykjavík og félagasamtök á Bíldudal.

Til baka