Rækjuvertíðinni er að ljúka og var afli góður en verð lág og rækjan smá. 

Rækjuver er nú að loka um sinn vegna markaðsaðstæðna en þar verður unnið að lagfæringum og endurbótum næstu mánuði. Reiknað er með að stoppað verði í tvo til þrjá mánuði. 

Steinbítsvertíð stendur nú sem hæst og er góður afli hjá bátunum. Nú sem stendur landa þeir Höfrungur BA, Þrándur BA og Skarfaklettur BA til vinnslu í frystihúsið, aflinn hjá þeim um helgina var um 35 tonn þannig að nóg verður úr að moða fram að páskum. Á meðan steinbítsvertíð stendur er nóg að gera í beitningaskúrunum og eru um átta til tíu manns í beitningu. 

Gráslempuvertíð er einnig hafin og verða tveir bátar gerðir út á hana frá Bíldudal en það eru þeir Ívar Hauksson og Gunnar Karl Garðarsson sem gera þá út. 

Þess má geta að landað var um 200 tonnum meiri afla á Bíldudal fyrstu þrjá mánuðina nú en á síðasta ári.

Vel miðar í byggingu íþróttahússins þannig að á Bíldudal er líflegt um að litast nú sem stendur. 

Og ekki má gleyma sveitinni. Sauðburður mun hefjast 17. maí í Grænuhlíð að sögn Maríu húsfreyju þar, en á Barðaströndinni, nánar tiltekið að Seftjörn, voru þegar komin lömb er ljósmyndari leit þar við um helgina.

Frétt og myndir Jón Þórðarson ( jth@snerpa.is )

Til baka