Skólabörn á Bíldudal hafa til margra ára haldið árshátíð á hverju ári með aðstoð kennara sinna. Áralöng hefð er fyrir því að allir nemendur skólans komi fram á árshátíðinni líkt og í ár.

Þema hátíðarinnar var að þessu sinni söngleikir. Yngstu krakkarnir úr 1. og 2. bekk sýndu brot út Benedikt búálf, Kardemommubærinn var viðfangsefni krakkana í 3. og 4. bekk, krakkarnir í 5. og 6. bekk léku atriði úr Grease, 7., 8. og  9. bekkingar fluttu atriði úr Rocky Horror og krakkarnir í 10. bekk fluttu efni sem þau sömdu sjálf er bar titilinn Svarthvít og dvergarnir sex.

Yngstu börnin komu fram og fluttu ljóð. Friðbjörn Steinar Ottósson flutti tvö lög ásamt Jóni Trausta Sverrissyni á bassa. Í lokaatriðinu sýndu „stúlkur frá Bíldudal“ frábæran dans.

Skólablaðið Vorboði var til sölu á hátíðinni en meðal efnis í blaðinu eru sögur og ljóð eftir nemendur skólans. Fengu  nokkrir nemendur viðurkenningar fyrir efni sem þeir höfðu lagt til blaðsins.

Húsfyllir var og létu gestir vel af hátíðinni. Var létt yfir öllum skemmtiatriðum og stóðu nemendur sig vel.

Til baka