Skipulagsstofnun hefur tilkynnt Íslenska kalkþörungafélaginu ehf að stofnunin fallist á fyrirhugað kalkþörunganám í Arnarfirði. 

Frá Hvestusandi í Arnarfirði

Næstu skref verða að leita til iðnaðarráðuneytis varðandi útgáfu starfsleyfis fyrir nám úr setlögum í Arnarfirði.

Íslenska kalkþörungafélagið fer nú yfir úrskurð Skipulagsstofnunar og þau tilmæli sem stofnunin setur þar fram. 

Í niðurstöðu Skipulagsstofnunar segir að kynnt hafi verið nám á allt að 57.000 rúmmetrum kalkþörungasets árlega til 50 ára af fjórum svæðum á grunnsævi í Arnarfirði.

Nám mun hafa veruleg áhrif á búsvæði kalkþörunga á efnistökusvæðum og áhrif þess á dreifingu fínefna og botnfalls þeirra á óröskuðum kalkþörungasvæðum eru óljós.

Stofnunin mælist til að við veitingu starfsleyfis verði haft í huga: 

• að val á námusvæðum verði takmarkað við suðurhluta Langanesgrunns, Fossfjörð og Reykjafjörð, þar sem innihald fínefna er hvað minnst samkvæmt mælingum (50 % eða lægra) og mælst er til að ekki verði unnið nema á einu svæði í einu, 
• að vöktun verði á útbreiðslu fínefna við dælingu úr setlögum og áhrif þeirra á kalkþörungasetlög í nágrenni við dælustað m.t.t. hugsanlegra mótvægisaðgerða,
• að nánari úrvinnsla fari fram á gögnum um botndýr á kalkþörungasvæðum þar sem verndargildi sé enn óljóst,
• að stjórnvöld beiti sér fyrir mörkun heildarstefnu um nýtingu kalkþörunga við strendur Íslands.

Stofnunin telur að öðru leiti muni nám á kalkþörungasetlögum ekki hafa veruleg áhrif á fugla, fisk, fiskveiðar, fiskeldi, krækling eða kræklingarækt og að fyrirhugð framkvæmd sé líkleg til að hafa jákvæð áhrif á atvinnulíf og íbúaþróun á sunnanverðum Vestfjörðum.

Kæra má úrskurð Skipulagsstofnunar til umhverfisráðherra og er sá frestur settur til 9. apríl 2003. 

Íslenska kalkþörungafélagið ehf er í eigu Atvinnuþróunarfélags Vestfjarða hf.

Sjá: NÁM KALKÞÖRUNGASETS ÚR ARNARFIRÐI, VESTURBYGGÐ OG ÍSAFJARÐARBÆ - Úrskurður Skipulagsstofnunar um mat á umhverfisáhrifum

Frétt Tíðis og bb.is, mynd Jörundur Garðarsson ( jorund@skaginn.is )

Til baka