Þegar gestir mættu í salinn tók á móti þeim ilmandi pönnukökulykt því fjórir vaskir sveinar, þeir Helgi Hjálmtýsson, Magnús B. Óskarsson, Svavar Sigþórsson og Þröstur Leo Gunnarsson hömuðust við að baka pönnukökur og gátu því gestir gætt sér á glóðvolgum pönnsum.

Það var einnig boðið upp rjómapönnukökur og kleinur sem bakaðar voru af Vilborgu Jónsdóttur og sendi hún þær frá Bíldudal og viljum við færa henni sérstakt þakklæti fyrir.

Elín Bjarnadóttir frá Hvestu fráfarandi formaður Arnfirðingafélagsins bauð gesti velkomna og tilkynnti um skipti á meðlimum í stjórn félagsins. Nýir meðlimir verða kynntir á næstu dögum hér á vefnum. Elín flutti skýslu stjórnar og sagði m.a. frá því að félagið hefði veitt styrk til kaupa á göngubretti fyrir aldraðra á Bíldudal.

Pétur Bjarnason hélt góða hugvekju og eru honum færðar bestu þakkir fyrir innlegg sitt. Erindi Péturs var helgað sr. Jóni Kr. Ísfeld sem margir munu þekkja eða kannast við. Verður meira að frétta af því hér innan tíðar.

Á sólarkaffinu var kynnt Sumarhátíðin Bíldudals grænar… sem haldin verður á Bíldudal 27.-29. júní nk. Valdimar Gunnarsson sagði gestum frá fyrirhugaðri hátíð, sýndi drög að dagskrá og kynnti merki hátíðarinnar sem Magnús B. Óskarsson teiknaði. Hátíðin verður kynnt sérstaklega á næstu dögum.

Þórarinn Hannesson steig á stokk ásamt þeim Bjarna Þór Sigurðssyni og Guðmundi Hjalta Jónssyni og fluttu þeir lag tileiknað hátíðinni. Lagið þótti hresst og skemmtilegt og vildu einhverjir senda það beint í Eurovision-keppnina. Þórarinn samdi bæði lag og texta.

Að lokum vill nefndin koma á framfæri kæru þakklæti til allra þeirra er hjálpuðu til við að baka allt góðgætið sem boðið var upp á. Án svona góðrar aðstoðar væri það stjórn félagsins ofviða að halda slíkar samkomur.

Kærar þakkir
Stjórn Arnfirðingafélagsins

Myndir Guðmundur Bjarnason (g.bjarnason@simnet.is)

Til baka