Tryggvi P. Friðriksson sem rekur Gallerí Fold í Reykjavík ( www.artgalleryfold.com ) fjallar um listamanninn með barnshjartað - Samúel Jónsson - í grein í Lesbókinni í dag sem ber yfirskriftina Vandamál í Selárdal.

Í greininni er stiklað á stóru í sögu Selárdáls og nokkrir ábúendur þar nefndir. Saga Samúels er rakin í stuttu máli og greint frá listiðju hans í Selárdal sem er öllum Arnfirðingum kunn. 

Í greininni segir Tryggvi: Vandamálið sem við er að glíma í Selárdal er þetta: Þarna bjó og starfaði afar sérstakur listamaður. Hann skildi eftir sig hálfköruð mannvirki og næfísk listaverk. Þau eru að grotna niður og eyðileggjast. Hvað skal gera? Að dómi skrifara er rétt að varðveita herlegheitin komandi kynslóðum til ánægju og yndisauka. Ljóst er að það kostar töluvert fé. Þótt skrifari sé ekki hrifinn af því að opinberir aðilar taki að sér ný verkefni, hvort heldur sem það er í listum eða á öðrum vettvangi, þá er varla önnur leið í sjónmáli.

Ennfremur segir í greininni: Samúel Jónsson var ekki lærður listamaður. Hann er í flokki svokallaðra næfista, eða einfara. Verk hans bera því glögglega vitni. Víða úti í heimi eru næfistarnir í hávegum hafðir. Verk þeirra eru varðveitt á listasöfnum og vinsæl meðal safnara. Hvergi er verkum þeirra fargað, eða þau látin eyðileggjast. Af íslenskum næfistum er Stefán Jónsson frá Möðrudal trúlega þekktastur og verk hans prýða mörg einkasöfn.

Og enn segir Tryggvi: Nú eru þessi verk í hættu, óblíð náttúruöflin eru smám saman að eyðileggja þau. Byggingar Samúels og listaverk hans liggja undir skemmdum og hafa gert í langan tíma. Þakið mun til dæmis hafa fokið af safnahúsinu sl. vetur. Starfandi er félag áhugamanna, sem hefur á stefnuskrá sinni að bjarga byggingunum og listaverkunum frá eyðileggingu, en satt að segja hefur lítið miðað, enda fjárráðin lítil.

Steinsteypt eftirlíking af hinum fræga ljónagosbrunni 
við Alhambrahöllina í Granada á Spáni en þarna eru 
líka sænykur, selur og fleira.

Það væri sannarlega óskandi að úr þessu vandamáli rættist fyrr en síðar svo komandi kynslóðir geti notið þessara verka Samúels sem bera mannsandanum göfugt vitni.

Til baka